Umuyobozi mukuru w’ingabo za Israel yeguye ku mirimo ye, avuga ko yamera ko yananiwe inshingano ze ku itariki ya 7 Ukwakira 2023, igihe umutwe witwaje intwaro wo muri Palesitine witwa Hamas wagabaga igitero simusiga kuri iki gihugu cyateje intambara muri Gaza.
Mu ibaruwa yandikiye minisitiri w’ingabo, Lt Gen Herzi Halevi, yemeye ko ingabo z’igihugu cya Israel (IDF) “zananiwe mu nshingano zazo zo kurinda abaturage ba Israel”.
Yongeyeho ati: “Uruhare rwanjye mu kunanirwa gukabije ruramperekeza buri munsi, buri saha, kandi bizakomeza kuba gutyo mu buzima bwanjye bwose.”
Uyu mujenerali yavuze ko azava ku mirimo ye ku itariki ya 6 Werurwe kandi yemera ko intego z’intambara za Israel zose zitagezweho.
Yongeyeho ati: “Igisirikare kizakomeza urugamba rwo kurushaho gusenya Hamas n’ubushobozi bwayo bwo kuyobora, kureba niba ingwate zagaruka” kandi bizafasha Abanya-Israel bavanywe mu byabo n’ibitero by’imitwe yitwaje intwaro gusubira mu byabo.
Nyuma yaho gato, umuyobozi w’ingabo mu majyepfo, Maj Gen Yaron Finkelman, na we yatangaje ko na we yeguye ku mirimo ye, avuga ko yananiwe “inshingano ze zo kurinda Negev y’Iburengerazuba ndetse n’abaturage bayo, b’intwari”.
Kwegura kwabo bibaye nyuma y’iminsi itatu hatangiye ihagarikwa ry’imirwano muri Gaza n’amasezerano yo kurekura imbohe yemeranijwe na Hamas, ufatwa nk’umutwe w’iterabwoba na Israel, Amerika n’abandi.
