Inkongi y’umuriro yongeye guca ibintu i Los Angeles muri Leta ya California, aho abaturage barenga ibihumbi 31 basabwe guhunga, abandi ibihumbi 31 babwirwa ko isaha iyo ari yo yose na bo basabwa guhunga.
:max_bytes(150000):strip_icc():format(webp)/GettyImages-21925586401-5ad88de4203f48fdbe3034fa8a8ccc60.jpg)
Iyi nkongi y’umuriro yahawe izina rya The Hughes yibasiye ibice by’Amajyaruguru ya Los Angeles, mu bilometero 67 uvuye muri uwo mujyi. Imaze gutwika ahantu harenga kilometerokare 30 ndetse iri kugana mu bice bituwemo.
Ubuyobozi bwatangaje ko umuyaga wihuta ugenda ku muvuduko wa kilometero 40 ku isaha, uri mu biri gutuma iyi nkongi ikwirakwira, gusa buvuga ko bufite ubushobozi bwo kuyizimya hakiri kare ku buryo bafite icyizere cy’uko itari bwangize ibintu byinshi.
Anthony Marrone uri mu bashinzwe kuzimya inkongi z’umuriro i Los Angeles yatanze icyizere cy’uko bari bushobore guhangana n’iyi nkongi, ashimangira ko biteguye neza kandi uyu muyaga udafite umuvuduko uri hejuru nk’uko byari bimeze mu nkongi ziherutse kwibasira ako gace.
Mu minsi ishize, inkongi z’umuriro zirenga eshanu zibasiye Los Angeles, zangiza inyubako ibihumbi 10 ndetse abagera kuri 28 bahaburira ubuzima.
