Perezida w’u Burusiya, Vladimir Putin, na Perezida w’u Bushinwa, Xi Jinping bagiranye ibiganiro bakoresheje ikoranabuhanga.
Ibi biganiro byibanze ku ngingo zirimo intambara ya Ukraine, ibihano by’ubukungu byafatiwe ibyo bihugu, ndetse n’ubufatanye mu mishinga y’iterambere.
Umujyanama wa Perezida Putin mu bya politiki mpuzamahanga, Yuri Ushakov yatangaje ko ibiganiro byamaze isaha n’igice.
Perezida Putin yashimangiye ko u Burusiya bwiteguye kugirana ibiganiro na Leta Zunze Ubumwe za Amerika hagamijwe kurangiza intambara ya Ukraine, ariko asaba ko byashingira ku bwubahane bw’impande zombi.
Ku rundi ruhande, Perezida Trump uherutse gusubira ku butegetsi avuga ko afite ubushake bwo guhagarika iyo ntambara mu gihe cy’amasaha 24.
Amakuru aheruka avuga ko itsinda rye riri gutegura gahunda yo gushyiraho agahenge karambye, hakajyaho igice kigera ku bilometero 1300 hagati y’impande zombi zihanganye kikagenzurwa n’ingabo z’Ubumwe bw’u Burayi.
Muri ibyo biganiro, Perezida Jinping yasangije Putin amakuru y’ibyo yaganiriye na Trump ku wa 17 Mutarama 2025 aho byibanze ku kuzahura umubano w’Amerika n’u Burusiya no kwirinda ko intambara yakomeza gusakara mu bindi bihugu.
Abakuru b’ibi bihugu kandi baganiriye ku bufatanye mu mishinga y’ubukungu n’ingufu harimo iy’imiyoboro ya gaz nka Far Eastern Pipeline na Power of Siberia 2, izavana gaz mu Burusiya ijya mu Bushinwa binyuze muri Mongolia.
Ibiganiro byarangiye abaperezida bombi bashimangiye ubushake bwo gukomeza gukorana mu nzego z’ubwikorezi, ibikorwaremezo, n’ubucuruzi hagamijwe kunoza iterambere ry’ibihugu byabo.
