Umunyarwenya wo muri Kenya, Vincent Mwasia Mutua uzwi ku izina rya Chipukeezy, yageze i Kigali aho yitabiriye igitaramo cya Gen-Z Comedy Show giteganyijwe kubera muri Camp Kigali, ku mugoroba wo ku wa Kane, tariki 23 Mutarama 2025.
Chipukeezy uri mu bafite izina rikomeye muri Kenya, akigera ku Kibuga cy’Indege Mpuzamahanga cya Kigali i Kanombe, yakiriwe na Fally Merci, utegura akaba anayobora ibitaramo by’urwenya bya Gen-Z Comedy Show.
Igitaramo Chipukeezy yatumiwemo, azahuriramo n’abarimo Muhinde, Babu, Clement, Cardinal n’abandi benshi bamaze kwamamarira muri ibi bitaramo.
Umwihariko wa Gen-Z Comedy Show yo kuri uyu wa Kane ni uko abazayitabira bazaganirizwa n’Umunyamakuru akaba n’Umushoramari mu Itangazamakuru, David Bayingana mu gihe bazanaririmbirwa na Bruce Melodie uheruka gushyira hanze album yise ‘Colorful Generation.’
Chipukeezy yaherukaga gutaramira mu Mujyi wa Kigali mu mwaka wa 2024 ubwo yari yatumiwe muri ‘The caravan of laughter’.
