Ihuriro ry’ingabo za Repubulika Iharanira Demokarasi ya Congo n’umutwe witwaje intwaro wa M23 biri kurwanira hagati mu mujyi wa Sake uherereye muri gurupoma ya Kamuronza, teritwari ya Masisi mu Ntara ya Kivu y’Amajyaruguru.
Iyi mirwano yatangiye ahagana Saa Kumi z’urukerera kuri uyu wa 23 Mutarama 2025, aho abarwanyi ba M23 bavuye mu birindiro bamazemo umwaka biri mu misozi ikikije uyu mujyi, bajya guhangana n’iri huriro.
Umuyobozi wa gurupoma ya Kamuronza, Primo Bauma, yatangarije ikinyamakuru Actualité ati “Imirwano iri kubera iwacu muri Kamuronza-Sake. Abarwanyi ba M23 bari kumanuka muri Sake.”
Amakuru aturuka muri RDC avuga ko abarwanyi ba M23 bashaka kugenzura umuhanda uhuza Kitshanga muri teritwari ya Masisi na Minova muri teritwari ya Kalehe.
Minova iherereye mu Ntara ya Kivu y’Amajyepfo yafashwe na M23 mu gitondo cya tariki 21 Mutarama 2025, nyuma y’imirwano ikomeye yayihanganishije n’ihuriro ry’ingabo za Leta ya RDC.
Imirwano yabereye muri Sake yatumye abaturage bari bayisigayemo bahungira mu mujyi wa Goma uri mu burasirazuba. Bivugwa ko bamwe mu bari mu nkambi ziri mu nkengero za Goma na bo bahunze kubera ubwoba bw’urusaku rw’imbunda bari kumva.
