Umunya-Serbia Novak Djokovic yikuye mu mukino wa 1/2 cya Australian Open 2025, bitewe n’imvune yagize nyuma y’iseti ya mbere yari imaze kwegukanwa na Alexander Zverev bari bahanganye.
Djokovic ni umwe mu bakinnyi bahabwaga amahirwe yo kuba bakwegukana iri rushanwa amaze gutwara inshuro 10 kuva mu 2008, gusa imvune yo mu mikaya y’ukuguru kw’ibumoso yatumye adakomeza kwandika amateka.
Agisohoka mu kibuga, abafana bamuvugirije induru bamwereka ko batanejejwe n’icyemezo afashe ku iseti ya mbere nyuma y’uko umukino ari bwo wari utangiye. Mu kiganiro yagiranye n’itangazamakuru, uyu mukinnyi yabiseguyeho.
Ati “Nakoze ibishoboka byose ngo nihagarareho ku mikaya yagize ikibazo. Iseti ya mbere yagiye kurangira numva kwihangana byanze ndi kubabara cyane, nta kindi nari gukora.”
“Iyo nza gutsinda n’iseti ibanza ntabwo byari kunkundira ko nkomeza guhangana mu mukino wari gufata amasaha nk’atatu cyangwa ane. Uyu munsi ntabwo byari gushoboka.”
Mugenzi we Alexander Zverev watsinze umukino, yavuze ko yababajwe n’abafana bamuvugirije induru kandi yari mu bihe bigoye.
Ati “Ndabizi buri wese aba yishyuye itike ye ngo arebe umukino w’amaseti atanu, ariko bibuke ko Novak Djokovic ari wa muntu wahaye byose umukino wa Tennis mu myaka 20 ishize. Yigeze gutwara iri rushanwa afite ikibazo mu nda, aritwara yaranavunitse akagombambari.”
“Niba rero yavuyemo bivuze ko byanze. Turabinginze ntimukajye muvugiriza induru umukinnyi wagize imvune.”
Imvune ya Djokovic yatumye Zverev agera ku mukino wa nyuma wa Australian Open, akaba agomba guhura n’uzatsinda hagati ya Ben Shelton na Jannik Sinner.
