Gen Pacifique Ntawunguka wamenyekanye ku izina rya Omega, yaguye mu mirwano yahanganishije M23 n’ihuriro ry’Ingabo za Leta ririmo na FDLR, muri teritwari ya Nyiragongo.
Omega yari umuyobozi w’ishami rya gisirikare rya FDLR rizwi nka FOCA (Les Forces Combattantes Abacunguzi) yishwe.
Amakuru y’urupfu rwa Omega yamenyekanye ku munsi w’ejo ku wa Gatandatu tariki 25 Mutarama 2025.
Ku mbuga nkoranyambaga hari ikiganiro cy’abagabo babiri bo muri FDLR bavuga ko komanda Omega ibye bitameze neza.
Umwe muri abo yagize ati: “Ubu ni ugusenga, ni ugufashanya gusenga nabonye ibintu bitameze neza.
Nabonye Aba FARDC basa n’abamushyize hagati mbona ubuzima bwe bugiye mu kibazo, niba ari ubugambanyi niba ari iki simbizi […] pole ni ugusabirana rero.”
Urupfu rwa Omega rwagarutsweho na Minisitiri w’Ububanyi n’Amahanga w’u Rwanda, Amb. Olivier Nduhungirehe, ubwo yagarukaga ku bufatanye bukomeje kugaragara hagati ya FARDC na FDLR.
Ni ubufatanye bwashimangiwe n’uko umugore wa Perezida wa RDC, Denise Nyakeru Tshisekedi, aherutse mu bitaro gusura abarwanyi b’uyu mutwe bakomerekeye ku rugamba.
Minisitiri Nduhungirehe yagize ati: “Ni ingenzi kuvuga ko uru ruzinduko (rwa Denise Nyakeru Tshisekedi rwo gusura abakomerekeye ku rugamba barimo n’abarwanyi ba FDLR) rwabaye mu masaha make nyuma y’iyicwa rya ‘General’ Pacifique Ntawunguka, umuyobozi w’igisirikare cya FDLR, uzwi nka Omega, nubwo ihuriro ry’Ingabo za FARDC ryari ryagerageje kurokora ubuzima bwe.”
Omega yavukiye muri Segiteri Gasebeya, Komini Gaseke muri Perefegitura ya Gisenyi mu 1964. Ubu ni mu Karere ka Ngororero mu Ntara y’Iburengerazuba.
