AS Kigali irashaka Umunya-Nigeria Nwobodo Johnson Chidiebere wamaze gutandukana na APR FC nyuma y’ubwumvikane bw’impande zombi.
Chidiebere yari Kapiteni wa Enugu Rangers yegukanye Igikombe cya Shampiyona ya Nigeria mu mwaka w’imikino ushize, muri Nyakanga ahita atangazwa nk’umukinnyi mushya w’Ikipe y’Ingabo z’Igihugu.
Uyu mukinnyi usatira izamu anyuze ku mpande ntiyabonye umwanya wo gukina muri iyi kipe, byatumye impande zombi zijya mu biganiro byo gutandukana.
Chairman wa APR FC yemeje ko bamaze kumvikana n’uyu mukinnyi gutandukana, kandi ko uyu mukinnyi yifuzwa na AS Kigali, ishaka ko yayikinira mu myaka ibiri iri imbere.
Kuri ubu, amakipe yose ari gusiganwa n’iminsi y’igura n’igurisha ry’abakinnyi muri uku kwezi, aho isoko ryo mu Rwanda rizafunga ku mpera zako.
APR FC kugeza ubu iri guhangana no gusubira ku mwanya wa mbere ikisubiza Igikombe cya Shampiyona, iri ku mwanya wa kabiri n’amanota 31, aho irushwa atanu na Rayon Sports iruyoboye.
AS Kigali iheruka gutandukana n’Umunya-Cameroun Armel Ghislain, yo yasoje imikino ibanza iri ku mwanya wa gatatu n’amanota 26, mu gihe izasubukura iyo kwishyura ihura na Bugesera FC.
Muri iki cyumweru, Abanyamujyi bazakina Igikombe cy’Intwari bazahuramo na APR FC muri ½ mu gihe undi mukino uzahuza Rayon Sports na Police FC.
