Donald Trump yirukanye abasaga icumi nyuma y’uko Minisiteri w’Ubutabera w’agateganyo, James McHenry avuze ko batabizera mu gushyira mu bikorwa gahunda za Perezida Trump.
Mu ibaruwa yandikiwe aba bakozi, McHenry yagize ati: “Kubera uruhare rwanyu mu gukurikirana Perezida Trump, ntabwo ubuyobozi bwabizeye mu gushyira mu bikorwa gahunda zayo.”
Ibi byabaye mu gihe guverinoma ya Trump yatangije iperereza ryihariye ku bashinjacyaha bakurikiranye bamwe mu bagize uruhare mu myigaragambyo yo ku wa 6 Mutarama 2021.
Abo bashinjacyaha bashinjwaga gukoresha nabi itegeko rya US Code 1512(c) mu gukurikirana abigaragambyaga, itegeko ryaje kugabanyirizwa imbaraga n’icyemezo cy’Urukiko rw’Ikirenga mu mwaka ushize.
Ed Martin, umushinjacyaha w’agateganyo i Washington, DC yasabye ko haboneka amakuru yose yerekeye ibirego byari bishingiye kuri iri tegeko, harimo dosiye, inyandiko, email, n’ibindi bitarenze ku wa Gatanu.
Ibi byateye impungenge mu bakoze kuri izi manza, bamwe batangaza ko batangiye gushaka abunganizi mu mategeko mu gihe bataramenya niba iperereza rigamije kubashinja ibyaha cyangwa ibindi birego.
Trump yari yaravuze ko azakurikirana abamushinjaga mu mushinga wo guhindura ibyavuye mu matora ya 2020. Iyi gahunda yateje impaka, bamwe mu bayobozi b’inzego z’ubutabera bayita “gusesagura umutungo.”
