Uganda Airlines, yatangaje ko yahagaritse ingendo ziva n’izijya mu Mujyi wa Kinshasa muri Repubulika Iharanira Demokarasi ya Congo.
Iyi sosiyete itangaje ibi nyuma y’uko muri RDC habereye ibikorwa byo kwibasira Uganda, byaranzwe no gutwika ndetse no gusahura ambasade y’iki gihugu iherereye i Kinshasa.
Abigaragambya bashinja iki gihugu cyo mu Majyaruguru y’u Rwanda gufasha umutwe w’itwaje intwaro wa M23 uhanganye n’ihuriro ry’ingabo za RDC mu rugamba.
Mu itangazo Uganda Airlines yashyize hanze ku wa 28 Mutarama 2025 yakomeje iti “Guhagarika ingendo byabaye ngombwa bijyanye n’akaduruvayo gakomeje kugaragara muri RDC harimo n’Umurwa Mukuru Kinshasa. Ingendo zihagaritswe kugeza ibintu bisubiye mu buryo.”
Kwibasira Ambasade ya Uganda iherereye i Kinshasa no guhagarika izo ngendo, byahuriranye n’uko ibintu bikomeje kujya ahabi muri RDC aho M23 ikomeje kwigarurira ibice bitandukanye byo mu Burasirazuba bw’iki gihugu birimo n’Umujyi wa Goma.
Uganda Airlines yajyaga i Kinshasa gatatu mu cyumweru, hagamijwe kunoza ubuhahirane hagati y’ibihugu byombi, na cyane ko Uganda ari kimwe mu bihugu by’ingenzi ku butegetsi bwa Kinshasa ku bijyanye n’ubucuruzi.
Mu 2024 imibare yagaragaje ko ubucuruzi hagati y’ibihugu byombi bwari bufite agaciro ka miliyoni 600$, bigizwemo uruhare n’ibyo Uganda yoherezayo nk’ibikomoka ku buhinzi, kuri peteroli n’ibijyanye n’ubwubatsi.
Ikindi ni uko Uganda yakoze ishoramari ritandukanye muri RDC aho yubatse nk’umuhanda wa miliyoni 300$ hagamijwe koroshya imigenderanire y’ibihugu byombi.
Mu myigaragambyo yagaragaye i Kinshasa kuri uyu wa 28 Mutarama 2025, abaturage bagaragaye bangiza imodoka, basahura ibikoresho byari muri amabasade, ibindi bice by’inyubako biratwikwa.
Ni ibintu byibajijweho cyane n’abagize Inteko Ishinga Amategeko ya Uganda bibaza ku hazaza h’ishoramari rya Uganda muri RDC.
Ni mu gihe abandi basabaga inzego z’ubutegetsi za Uganda gukora uko zishoboye kugira ngo Abanya-Uganda baba muri RDC barindirwe umutekano.
