Inzego z’umutekano za Leta Zunze Ubumwe za Amerika zitwaje intwaro ziremereye, zatangije ibikorwa byo gufata abimukira binjiye mu gihugu mu buryo bunyuranyije n’amategeko, aho bakekwaho ibyaha bikomeye mu Mujyi wa New York.
Ni igikorwa cyakurikiranwaga n’Umunyamabanga muri Minisiteri y’Umutekano w’Imbere muri Amerika, Kristi Noem, wari uri aho. Wari umunsi we wa kane atangiye izi nshingano.
Abinyujije ku rukuta rwe rwa X, Kristi, yagize ati “Turi muri New York iki gitondo, turimo gukura aba bagizi ba nabi mu mihanda. Minisiteri y’Umutekano w’Imbere, iri gukora ibyo Perezida Donald Trump yasezeranyije abaturage, byo kugarura umutekano mu mihanda.”
Mu bafashwe uwo munsi, hari harimo umwe wakekwagaho ibyaha birimo gushimuta abantu, gukubita no gukomeretsa n’ubujura bwifashishije intwaro.
Undi wafashwe ni uwitwa Anderson Zambrano-Pacheco w’imyaka 25, bivugwa ko ari we wari umuyobozi w’agatsiko k’abagizi ba nabi kitwa ’Tren de Aragua’, kagizwe n’abakomoka muri Venezuela, gashinjwa gutera ubwoba abaturage bo muri Colorado.
Nyuma yo kurahirira kuyobora Amerika, Perezida Trump yahise afata ingamba zo gukaza umutekano ku mupaka uhuza Leta Zunze Ubumwe za Amerika na Mexique, anatangiza ibikorwa byo gufata abimukira badafite ibyangombwa mu mijyi minini.
Trump yavuze ko kuba hari abimukira batagira ibyangombwa ari “ukwinjirirwa” kwa Amerika.
Ibiro bya Perezida wa Amerika, biherutse gutangaza ko biri no gukora ibishoboka kugira ngo abimukira bahamijwe ibyaha bikomeye basubizwe mu bihugu byabo.
