Biteganyijwe ko umucamanza apfundikira urubanza rwa Munyenyezi kuri uyu wa Gatatu, hatagize igihinduka.
Bruce Bikotwa na mugenzi we Felicien Gashema bunganira Beatrice Munyenyezi batindanye ijambo rya nyuma ku rubanza aburanamo n’ubushinjacyaha ibyaha bya jenoside. Bavuze ko abatangabuhamya bamushinja ibyaha nyamara batari bamuzi mbere no mu gihe cya jenoside.
Bavuga ko abatangabuhamya baranzwe no kwivuguruza, kuvuguruzanya no kutavugisha ukuri mu nzego z’ubugenzacyaha, mu bushinjacyaha no mu rukiko.
Bongeyeho ko ahubwo abashinjuye uwo bunganira barimo Athanasie Mukamwiza, Alphonsine Nyiraburiri ari bo bavugishije ukuri mu buhamya bwabo.
Munyenyezi, ni umukazana wa Polina Nyiramasuhuko wahoze ari minisitiri w’umuryango ku ngoma y’abatabazi. Inkiko za Arusha zamuhamije ibyaha bya jenoside zimukatira gufungwa imyaka 47. Ni mu gihe umugabo wa Munyenyezi, Arsene Shalom Ntahobari, na we yahanishijwe gufungwa imyaka 25 ku byaha bya jenoside.
Leta Zunze Ubumwe za Amerika zohereje Munyenyezi mu Rwanda mu 2021 nyuma yo gusanga yaratanze amakuru atarimo ukuri ku binjira n’abasohoka. Ibyaha aregwa bikekwa ko yabikoreye mu cyahoze ari perefegitura ya Butare.
Ahakana ibyo ashinjwa akavuga ko bishingiye ku nyungu za politiki.
